M E N D I E T A  K U L T U R A

XVII. eta XVIII. mendeetako Espainiako herri-musikak inspirazio-iturri izan ziren Europa osoko musikagileentzat. Baina jauregietatik eta gorteetatik aldentzen zarenean aurkitzen duzu ingurune herrikoietako musika-praktiken benetako funtsa. Horietan ohikoa zen hamar bat konpasetako zirriborro harmoniko hutsetatik abiatuz musika-pieza berriak airean inprobisatzea. Interprete hauen ildoari jarraituz, gure egin nahi izan dugu íncipit musikalaren kontzeptua, eta tresna sortzaile gisa apainketa, inprobisazioa eta bariazioa erabiliz, programa honetako errepertorio osoa sortu dugu. Bertan, antzinako musika bezala definitu ohi duguna nahita gainditzen duten piezak aurkituko dituzu, gure egunetatik Espainiako kale, areto, antzoki eta tabernak txakona, zarambeque, fandango edo folíek betetzen zituzten garaietaraino joan-etorriko ibilbidea planteatuz.

​​​​​

​

Concerto 1700

 

2015ean Daniel Pinteño biolin-jotzaileak sortu zuen Concerto 1700, eta hasieratik izan du helburu XVII. eta XVIII. mendeetako ondare musikal hispaniarra berreskuratzea eta zabaltzea. Jatorrizko garaiko tresnak erabiltzen ditu, bai eta garaiko interpretazio praktikaren azterketa musikologiko zorrotza ere. Hala ere, bere interpretazioen interesa ez datza iragana birsortze hutsean, baizik eta egungo publikoarentzat pizgarria izango den esperientzia bat sortzeko borondatean.

Espainiako panorama historizistako talde garrantzitsuenetako bat izatea lortu du, ospe handieneko jaialdi eta aretoetako batzuetan parte hartuz, hala nola CNDMko Unibertso Barrocoan Espainiako Auditorio Nazionalean, Granadako Nazioarteko Musika eta Dantza Jaialdian, Santanderreko Nazioarteko Jaialdian eta Donostiako Musika Hamabostaldian.

Errepertorio barroko hispaniarra zabaltzeko konpromisoa zabalduz, 2018an bere zigilu diskografikoa sortu zuen, 1700 Classics. Bere argitalpen guztiek arrakasta handia izan dute kritikaren aldetik, eta Scherzoren Disko Aparta eta France Musiqueren Disque classique de le jour kalifikazioak jaso dituzte, baita ICMA Awards sarietarako izendapenak ere.

22/23 denboraldian, Musika Hedatzeko Zentro Nazionaleko (CNDM) talde egoiliarra izan da, Espainiako hiri askotan eta atzerrian emanaldiak eskainiko dituen kontzertu-birarekin. Denboraldi honetatik musika jarduera bizia garatzen ari dira Madrilgo Fernando de Castro Fundazioko talde egoiliar gisa.

​

​

Daniel Pinteño

​

Kritikaren ustez, Espainiako panorama historizistan gorantz datorren eta proiekzio handienetarikoa duen figura da . Malagan jaio zen, Murtziako Musika Kontserbatorio Profesionalean hasi zen ikasten Emilio Fenoyren eskutik eta, ondoren, Juan Luis Gallegorekin amaitu zuen Aragoiko Goi Mailako Musika Kontserbatorioan. Bere heziketa urteetan, eskola magistraletara aktiboki joan zen Nicolas Chumachenco, Alexei Bruni, Mikhail Kopelman, Alberto Lysy eta Ida Bieler bezalako nazioarteko bakarlariekin, besteak beste. Geroago, Alemaniara joan zen, eta han Hochschule für Musik Karlsruhe-ko Nachum Erlichekin irakaslearekin jarraitu zituen hobekuntza-ikasketak.

2010. urteaz geroztik, XVII. mendeko biolinerako musikaren hastapenetatik XIX. mendearen erdialdeko hizkuntza erromantikora bitarteko errepertorioa interpretatzera bideratu zuen bere musika-lana, irizpide historikoei jarraiki. Horretarako, Enrico Onofri, Anton Steck, Hiro Kurosaki, Catherine Manson, Enrico Gatti, Sirkka-Liisa Kaakinen-Pilch, Margaret Faultless, Jaap ter Linden eta beste irakasle batzuen eskolak jaso zituen. Horrez gain, Errioxako Unibertsitatean eta Madrilgo Universidad Complutensean Musikologia ikasi zuen. Toulouseko (Frantzia) Conservatoire à Rayonnement Regional-en biolin barrokoa ikasi zuen Gilles Colliard biolinista suitzarrarekin eta Madrilgo Goi Mailako Errege Musika Kontserbatorioan Hiro Kurosakiren babespean.

XVIII. mendeko Espainiako ondare musikala berreskuratzeko bere grinak nazioarteko kritikaren onespena ekarri dio. 2019an, BBVA Fundazioak ematen duen kultura-ikertzaile eta -sortzaileentzako Leonardo beka bat lortu zuen, eta, beka horrekin, «Antonio de Literes (1673-1747): Sacred cantatas for alto» albuma berreskuratu eta grabatzeko proiektua egin zuen. 2023an, Malagako Udalak eta La Caixa Fundazioak emandako «2022 Ekoizpen Artistikoaren Saria» jaso zuen.

Daniel Pinteñok XVIII. mendearen erdialdeko italiar biolin anonimo batekin jotzen du.